فعل لازم کی پہچان کے طریقے

فعل لازم کی پہچان کا طریقہ

فعل لازم کی ١٧علامات ہیں: پھر یہ علامات دو حصوں میں منقسم ہوتی ہیں

١۔ جن کا تعلق ترجمہ یعنی معنی کے ساتھ ہے

٢۔ جن کا تعلق وزن اور باب کے ساتھ ہے

وہ علامات کے جن کا تعلق ترجمہ یعنی معنی کے ساتھ ہے وہ دس ہیں

١۔ وہ افعال کہ جن کے اندر طبیعت، فطرت، مزاج والا معنی ہو، لازم ہوتے ہیں۔ جیسے: شَجُعَ، شُجَاعَةً بہادر ہونا، حَسُنَ، حُسْناً خوبصورت ہونا قَبُحَ، قَبَاحَةً برا ہونا

٢۔ وہ اَفْعَال کہ جن میں نظافت یعنی پاکیزگی و صفائی والا معنی ہو، لازم ہوتے ہیں۔ جیسے: طَھُرَ، طَھَارَۃً صاف ہونا نَظُفَ، نَظَافَةً صاف ستھرا ہونا

٣۔ وہ افعال کہ جو ایسے عارضہ پر دلالت کریں جو عارضہ غیر لازم ہو، لازم ہوتے ہیں۔ جیسے: مَرِضَ، مَرَضًا بیمار ہونا کَسِلَ، کَسَلًا سست ہونا حَزِنَ، حَزَناً غمزدہ ہونا

٤۔ وہ افعال کہ جو ھیئت پر دلالت کریں، لازم ہوتے ہیں۔ جیسے: طَالَ، طُوْلاً لمبا ہونا

٥۔ وہ افعال کہ جو غلاظت والے معنی پر دلالت کریں، لازم ہوتے ہیں۔ جیسے: قَذِرَ، قَذَراً میلا ہونا وَسِخَ، وَسَخاً گندا ہونا

٦۔ وہ افعال کہ جو زیور، زیب و زینت والے معنی پر دلالت کریں، لازم ہوتے ہیں۔ جیسے: کَحِلَ، كَحَلاً آنکھوں کا سرمگیں ہونا دَعِجَ، دَعَجاً بڑی آنکھوں والا ہونا نَجِلَ، نَجَلاً بڑی اور خوبصورت آنکھوں والا ہونا۔

٧۔ وہ افعال کہ جن کے اندر عیب والا معنی ہو، لازم ہوتے ہیں جیسے: عَمِشَ، عَمَشاً کمزور نظر ہونا عَوِرَ، عَوَراً آنکھ کی بینائی جاتے رہنا۔

٨۔ وہ افعال کہ جو رنگ والے معنی پر دلالت کریں، لازم ہوتے ہیں۔ جیسے: اِخْضَرَّ ہرا ہونا، اِصْفَرَّ زرد ہونا، اِحْمَرَّ سرخ ہو جانا۔

٩۔ وہ افعال کہ جن کے مصادر کے ترجمہ میں لفظ ہونا آئے، لازم ہوتے ہیں۔ جیسے: لمبا ہونا، داخل ہونا وغیرہ۔ اور وہ افعال کہ جن کے مصادر کے ترجمہ میں لفظ کرنا آئے متعدی ہوتے ہیں۔ جیسے مدد کرنا، ظلم کرنا۔

١٠۔ وہ افعال کہ جن کی ماضی کے ترجمہ میں لفظ وہ آئے، لازم ہوتے ہیں۔ جیسے: وہ گیا، وہ آیا وغیرہ۔ اور وہ افعال کہ جن کی ماضی کے ترجمہ میں لفظ اس آئے متعدی ہوتے ہیں۔ جیسے اس نے مدد کی، اس نے مارا وغیرہ۔

وہ علامات کہ جن کا تعلق وزن اور باب سے ہے

١۔ وہ افعال کہ جن کے مصادر فُعُوْلٌ کے وزن پر ہوں، لازم ہوتے ہیں۔ جیسے لحوق، دخول وغیرہ

٢۔ وہ افعال کہ جن کی ماضی فَعُلَ کے وزن پر ہو، لازم ہوتے ہیں۔ جیسے کَرُمَ، شَرُفَ، جَمُلَ وغیرہ

٣۔ وہ افعال کہ جن کی ماضی اِنْفَعَلَ کے وزن پر ہو، لازم ہوتے ہیں۔ جیسے اِنْکَسَرَ، اِنْطَلَقَ، اِنْصَرَفَ وغیرہ۔

٤۔ وہ افعال کہ جن کی ماضی اِفْعَلَّ کے وزن پر ہو، لازم ہوتے ہیں۔ جیسے: اِزْوَرَّ، اِحْمَرَّ، اِغْبَرَّ وغیرہ۔

٥۔ وہ افعال کہ جن کی ماضی اِفْعَالَّ کے وزن پر ہو، لازم ہوتے ہیں۔ جیسے: اِحْمَارَّ، اِزْوَارَّ، اِفْضَارَّ وغیرہ۔

٦۔ وہ افعال کہ جن کی ماضی اِفْعَلَلَّ کے وزن پر ہو، لازم ہوتے ہیں۔ جیسے: اِقْشَعَرَّ، اِطْمَأَنَّ، اِکْفَھَرَّ وغیرہ۔

٧۔ وہ افعال کہ جن کی ماضی اِفْعَنْـلَلَ کے وزن پر ہو، لازم ہوتے ہیں۔ جیسے: اِحْرَنْجَمَ، اِقْعَنْسَسَ وغیرہ۔

[از:جَامِعُ الدُّرُوْسِ العَرَبِیَّةِ،اَلصَّرْفُ اَلْکَافِيْ]

Tags: استعمال کی صورتیں

• Facebook
• Twitter